صبرك عالي أجبال و حكمهم لِلجبّانه
par Ons Bouali
إلى ابناء وطني، جرحى الثّورة و ضحايا صمتنا : راشد العربي، محّمد جندوبي, جهاد مبروك، وليد كسراوي, محمّد البوغانمي، مارام، نورة، منتصر و القائمة تطول
نلوم و نغضب كيفاش نسيتِك
انت حرّرتني نرجع نبوسلك جبينك
نقلّك ماليوم وجيعتي من وجيعْتك
الضّلوع مقطوعه تِلزم دواء وإعانه
وأضعف الإيمان هات طرف حْنَانه
قالوا انشاء الله لا باس دُقّْ عالسّفاره
الحكومة أولى و في الدّيون غرقانه
قالوا وفات لفلوس اما جيوبهم مليانه
دمّك يِنْزِف شهور وسُلْطِتْهم عطشانه
لحمك تْقطّع طروف و قلوبهم عريانه
قالوا يخافوا ربّي أما ظلمهم طْلَع متخُبّي
يِعيشوا احرار بدمّك ودَمنا يِسَيْلُوه بشرع ربّي
يحبّوا الكراسي يشدّوها كي ناس بِكري
يحقروك و يهمشوك إمّلا يدهم في **ي
نساو كان موش انت
يُقعدوا في هانة الرِّجَّالَه
كان موش صياحِك انت
يِمُوتوا ساكتين كالهَجَّالَه
صبرِك عالي أجْبَال
صبرك عالي أجبال و حُكْمهم لِلجَبّانه
